Internet allra hluta

Það er samdóma álit flestra sem til þekkja að internetið sé engin bóla, heldur komið til að vera. En internet nánustu framtíðar verður ekki bara í tölvunni þinni og símanum. Líklegra er að meira og minna allir hlutir verði nettengdir.

Ný könnun sem greiningarfyrirtækið Harris Interactive gerði á meðal framámanna í tæknigeiranum sýnir að margir horfa til þess að nettengdra heimilistækja, eða svokallaðra M2M (Machine-to-machine) samskipta, sem næstu bylgju í tækniheiminum. Alls voru rúmlega 750 stjórnendur tæknifyrirtækja í Bandaríkjunum, Bretlandi, Þýskalandi, Kína, Indlandi og Brasilíu spurðir hvað framtíðin bæri í skauti sér. Framtíðarsýn þeirra er sú að tæki tala hvert við annað til þess að safna upplýsingum, spá fyrir um hegðun og bjóða upp á sérsniðnar lausnir. Á ensku er tíðum talað um The Internet of Things, í þessu sambandi, eða internet hlutanna.

Alls er gert ráð fyrir að 24 milljarðar tækja verði nettengd árið 2020. Þegar á þessu ári verða snjallsímar og spjaldtölvur fleiri en jarðarbúar og gert er ráð fyrir að gagnamagn sem skapað verði á árinu nemi að lágmarki 4 milljörðum terabæta. Með aukinni söfnun upplýsinga um notendahegðun og staðsetningar upplýsingar, gagnavinnslu í skýinu, og bættum tengihraða (4G) má búast við að við verðum fljótlega vör við sífellt meiri áherslu tæknifyrirtækja á að bjóða upp á sérsniðnar lausnir fyrir þig miðað við stund og stað.

Við höfum þegar dæmi um snjalla hitastilla á borð við Nest, sem lærir inn á notkun þína, og stillir hitastigið á heimilinu miðað við upplýsingar sem það safnar um þig, verðurfar og tíma dagsins. Þannig vaknarðu alltaf við kjörhitastig, en dregur úr orkunotkun á meðan þú sefur eða ert að heiman. Það er nú þegar hægt að fá nettengda ísskápa sem geta sent þér upplýsingar um það sem í þeim má finna, sem getur komið sér ágætlega þegar þarf að ákveða hvað á að vera í matinn. Og hversu þægilegt væri það ef brauðristin og kaffikannan gætu talað við vekjaraklukkuna í símanum þínum og vissu hvenær ætti að byrja að undibúa morgunmatinn?

Margir binda miklar vonir við að bæta megi umferðarmenningu og minnka mengun með því að nettengja ökutæki. Það kynni að spara töluverðan tíma að hafa upplýsingar um umferð og ástand vega þegar lagt er af stað í vinnuna, eða ef þú þyrftir aldrei framar að leita að lausu stæði. Eða ímyndum okkur bíl sem talar við umferðaljós og stillir ökuhraðann í samræmi við þau. Eða snjöll umferðaljós sem dreifa álagi á gatnamót í samræmi við umferð. Borgarskipulag er einn fjölmargra þátta sem mun í auknum mæli taka mið af því gífurlega upplýsingamagni sem við erum að skapa.

Heilbrigðisgeirinn mun gera slíkt hið sama. Nú er hægt að fá baðvog sem safnar upplýsingum um þyngd þína, og hægt er að tengja þær upplýsingar við smáforrit þar sem þú getur skráð næringarinntöku (og án efa verður búið að tengja ísskápinn við þetta með einhverjum hætti innan tíðar). Margir sjá fyrir sér ýmiskonar skynjara sem greina upplýsingar um hjartslátt, eða fylgjast með samsetningu blóðsins og greina fyrstu merki sjúkdóma og sýkinga. Það er ómögulegt að spá fyrir um hvernig sú tækni mun líta út, en það má búast tækni sem byggir á gríðarlegu magni heilsufarsupplýsinga og sjúkrasögu verði í auknum mæli hluti af forvirkri heilbrigðisþjónusta innan fárra ára.

En nettengd tæki eru ekki einungis okkur til hægðarauka (sem er reyndar álitamál) heldur sjá framleiðendur sér einnig talsverðan hag í að safna upplýsingum um notkun vörunnar. Iðulega senda símar og tövur, og þau forrit sem við notum í þeim, upplýsingar um það hvernig við notum þau til framleiðenda sinna. Þessar upplýsingar eru svo notaðar til að meta hvernig er hægt að bæta vörunna enn frekar. Líklegt er að slíkar notendaupplýsingar eigi eftir að stýra þróun margra tækja í framtíðinni, allt frá brauðristum til bíla.

Það er í öllu falli ljóst að áhugi framleiðenda á að nettengja vörur sínar er mikill. Internet hlutanna mun vænanlega verða næsta bylting netsins.

Auglýsingar

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s